A Coruña celebrou con música o Día dos Medios en Galego
Volveu a AMEGA escoller a Coruña para celebrar o pequeno festival no marco do Día dos Medios en Galego. Este mesmo 7 de febreiro, data escollida pola entidade para lembrar a primeira publicación feita en galego (O Tío Marcos da Portela, 1876), o Playa Club acollía o doble concerto de dúas bandas galegas.
Antes da música, representantes da AMEGA, o Secretario Xeral de Política Lingüística e as artistas de Leria e A Banda da Loba presentaron o festival reivindicando a necesidade e o papel dos medios en galego no proceso de normalización.
As primeiras en saltar ao escenario foron as herculinas Leria. A banda emerxente, a base de sons frescos e guitarreiros e dunha posta en escena moi entregada, demostraron que en moi pouco tempo estarán na primeira liña da nova onda da música galega contemporánea.
A Banda da Loba ofreceu tamén un espectáculo moi completo cunha marea de ritmos diferentes, e puxeron o peche cun Fabricando Luz xa convertido en himno nacional que cantou todo o Playa.
